Imo Vigilante Don Stab Fresh Graduate Kpai For Body, Finish Am.

One fresh graduate from Federal Polytechnic, Nekede for Imo State, wey dem identify as Steven, don allegedly die after suspected vigilante operatives stab am to death.. Dem say the vigilante operatives stop Steven try rob am, but when he no gree make dem carry him things, dem stab am. “Friday night, one young man wey just graduate from Fed Poly Nekede, Steven, na so some criminals kill am after dem try rob am. People talk say na vigilante dem be, but e never sure. Dem try collect him money, and as him dey struggle with dem, dem stab am,” the report talk.

NaijaConfra still talk say after dem stab Steven, he run enter bush to save himself, but sadly, dem find him dead body for inside bush the next morning, he don bleed die from the stab wounds. Friends of Steven don cry out, dey beg make justice show face. One of him friends, Smart Nation, post for Facebook say, “Na dream be this? How person wey suppose protect us go be the same wey kill our brother? Rest well #Stevo!” Another person, Miracle Oke, beg say, “Abeg make una help us get justice for my brother death.” As at when dem write the report, Police PRO for Imo State, Henry Okoye, no pick call or reply text message wey dem send to am. People for South-East don dey complain say some local vigilante dey abuse power, from illegal arrest, night raid, to even killing,  all in the name of keeping order