Rabat Go Host 2026 Africa World Cup Play-Offs

Di Confederation of African Football don confirm say di 2026 African World Cup qualifying play-offs go happen for Morocco capital, Rabat. Di mini tournament go feature Cameroon, DR Congo, Gabon and Nigeria as dem battle for World Cup ticket. Nigeria go first jam Gabon for di first semi-final on November 13, and na hot clash e go be as two star strikers, Victor Osimhen wey dey play for Turkey and Pierre-Emerick Aubameyang of Marseille, go lead dia sides. Osimhen hat-trick wey help Nigeria waka enter di play-offs on goal difference don make Super Eagles fans dey ginger for di big match. Later dat same day, DR Congo go face Cameroon di team wey don reach World Cup eight times, di highest for Africa.

Di second semi-final fit see Manchester United striker Bryan Mbeumo show face after im double against Brighton lift di Red Devils for Premier League last weekend. DR Congo dey eye dia second-ever World Cup appearance, di first time na when dem still be Zaire for 1974 wey dem lose all dia group games, including 9-0 to Yugoslavia. Winners of di play-offs go enter di six-nation intercontinental play-offs for March next year, where two World Cup tickets go dey up for grabs. Bolivia and New Caledonia don already qualify, while Iraq or UAE go rep Asia, and Curacao plus Costa Rica dey front-run for di Caribbean/Central America slot. All di matches go shele for Rabat.