Galatasaray Oga Don Hint Say Lookman Fit Join Dem Soon

Galatasaray General Secretary, Eray Yazgan, don hint say Ademola Lookman fit soon join di Turkish club for di next transfer window. Reports talk say Galatasaray don eye Lookman since summer, but dem pause di talks after Atalanta yarn say e go cost €60 million to release di 28-year-old Nigerian baller. For one award event, when dem ask Yazgan about di Lookman matter, e talk say, “We get solid squad already, but we still dey build am as our coach want.” Dis one don make football fans believe say Galatasaray still dey plan big move for Lookman.

Lookman, wey be current African Footballer of di Year, still dey face gbege for Atalanta after im relationship with di club scatter again. Di Super Eagles star even go on strike during summer when im move to Inter Milan fail, and though dem later add am back to di squad, im still clash with former coach Ival Juric for Champions League match against Marseille. Di coach grab Lookman for arm after substitution, and dem separate dem for touchline. Now, Juric don lose im job, Raffaele Palladino don take over, but Lookman future still hang. Im contract still dey valid till June 2027, meaning any club wey want sign am go drop serious money.