“No Be Magic Fix” – Joan Garcia Yarn About Yamal Injury For Barca

Barcelona goalkeeper, Joan Garcia, don open up about di wahala wey young star Lamine Yamal dey face with im groin injury (pubalgia), and e talk say di injury no be small matter to manage at all. Yamal don dey struggle for some time now, and e don just collect treatment wey go make am miss Spain World Cup qualifier matches against Turkey and Georgia. Garcia yarn say e don see am with im own eye how Yamal dey manage di pain, and e confirm say no be something wey get quick fix. “Everybody dey talk say groin injury dey complicated. I don see am myself, you gats dey very careful. No be magic cure,” Garcia tell RAC1.

Di Barca keeper still talk say dem dey monitor Yamal workload small small, and e don dey improve wella. “You gats dey careful with workload and increase am gradually. True true, Lamine don progress well and we dey hope say e go continue like dat,” Garcia add. Barcelona dey pray say di treatment and rest wey Yamal dey get during di international break go help am bounce back strong. Both Yamal and Garcia dey expected to return to action when Barca face Athletic Club for dia next match.