Arteta Talk Say Gyokeres No Go Face Slavia Prague

Arsenal coach Mikel Arteta don confirm say Sweden striker, Viktor Gyokeres, no go fit play against Slavia Prague because of di muscle injury wey make am commot for pitch during Arsenal 2-0 win over Burnley last weekend. Gyokeres no train on Monday as Arteta talk say him dey worried since di player never get this kind muscle wahala before. Di Spaniard yarn for pre-match press conference say dem dey still check di injury well to sabi how bad e be. “He no go play Slavia, he never train today. We go still do more test and scan to know how e dey,” Arteta talk.

Di injury don add Gyokeres join di long list of Arsenal players wey dey sidelined, including Kai Havertz, Gabriel Jesus, Gabriel Martinelli, Noni Madueke and Martin Odegaard. But di Gunners still dey chase dia 10th straight win and eighth clean sheet as dem go face Slavia Prague. Arsenal, wey dey six points clear of Manchester City for Premier League table, still never win Champions League before but don win dia first three games this season. Arteta still vex say fixture congestion fit affect dem, as e beg Premier League make dem shift dia match with Everton since dem go play Crystal Palace for Carabao Cup just two days before. “We get seven players out already. Make dem respect players’ welfare,” Arteta add.