Newcastle Thrash Mourinho Benfica For Champions League

Harvey Barnes score two goals from bench as Newcastle carry 3-0 hammer land Jose Mourinho Benfica for Champions League showdown for St. James’ Park. Anthony Gordon open di scoring for first half, as Benfica still dey waka with zero point for dis Champions League season. Barnes enter after one hour play and scatter di show with two correct right-footed finishes wey help Newcastle dey on track to qualify from di league phase. Newcastle don bounce back strong after dem lose to Barcelona, with two straight wins, including dat 4-0 demolishing of Union Saint-Gilloise. Dis win don push dem above Real Madrid and Barcelona go number seven for di Champions League table.

Mourinho wey last month call himself “small Magpie” because of him respect for Bobby Robson, di Newcastle legend wey give am coaching break, chop another bitter result. Na Robson wey first carry Mourinho follow body as translator for Sporting Lisbon, Porto and Barcelona, before Mourinho begin him own coaching journey with Benfica. But now, na Newcastle don disgrace am again after Chelsea bin beat am last month too. Even though Lukebakio disturb Newcastle defence early with dangerous runs and one shot wey knack post, na Gordon wey score first after Bruno Guimaraes connect Murphy down di wing. Pope even get assist for Barnes first goal as im throw pass Antonio Silva and Barnes rush am finish like boss. Gordon later set up Barnes for second goal as Newcastle brush aside dem Premier League scoring wahala and eye top-eight finish to reach Champions League last 16. Dem still get games against Bilbao, Marseille, Leverkusen, PSV and final wahala night with PSG.