Alleged Terrorism: Court Throway Nnamdi Kanu No-Case Submission, Order Am Make E Open Defence

Federal High Court for Abuja don throway the no-case submission wey Nnamdi Kanu, self-acclaimed leader of the Indigenous People of Biafra (IPOB), file for him ongoing terrorism case. Justice Omotosho wey deliver the ruling on the matter talk say the Federal Government don show enough evidence wey suppose make Kanu enter witness box go defend himself. The judge talk say the evidence wey prosecution carry come court, plus the exhibits wey dem tender, don raise serious allegation say Kanu get hand for terrorism activities. Because of that, the court say e must defend himself to clear the air. The court also talk say because Kanu dey claim say dem do “extraordinary rendition” carry am come Nigeria, e get right under the law to explain and show evidence on top the matter. So, for fairness, dem gatz give am opportunity to enter defence. Kanu dey face seven-count charge from DSS, wey relate to alleged involvement for terrorism activities.

Court Order NMA to Check Kanu Health

Meanwhile, the court don order make the President of the Nigerian Medical Association (NMA) set up medical team of between 8 to 10 people to check whether Nnamdi Kanu fit still continue trial or not, based on the health problem wey e talk say e dey face. Justice Omotosho give the order after Kanu apply make dem transfer am go private ward for National Hospital for urgent medical treatment, say the illness wey dey worry am fit threaten him life. The judge say the NMA medical team go check whether the health condition wey Kanu talk dey serious enough to stop the trial from going on.