Lagos Man Go Court Because Dem Say Im Do Sexual Wahala To Small Boy.

One 28-year-old Lagos trader, Okonkwo Chikwado, don land for Ikeja Chief Magistrate’s Court sake of say e allegedly sexually assault one small boy. Chikwado, wey dey live for 2, Asake Street, Ishashi, Lagos, dey face one count of sexual assault. Di prosecutor, ASP Adegoke Ademigbuji, tell di court say di thing happen on July 14 for di defendant house. According to am, di defendant allegedly call di 15-year-old victim enter im room, con lie say e wan send am go errand.

But as di boy enter, dem say Chikwado lock di door quick and sexually assault am. Ademigbuji talk say di alleged offence break Section 261 of di Lagos State Criminal Law, 2015, wey dey set punishment for sexual offences. Chief Magistrate L. A. Owolabi no gree hear di defendant plea. E order make dem keep Chikwado for Kirikiri Correctional Centre till dem get legal advice from di Director of Public Prosecution, DPP. Dem adjourn di case go October 22 for mention.