Lagos Go Start Emergency Transport Service For Women Wey Dey Labour

Lagos State don get selected to pilot one federal initiative wey go provide emergency transport service for women wey dey labour. Di program, wey go soon start, go also give pregnant women free Mama Kits and free caesarean section for 21 obstetric centres across di state. Dr. Dayo Adeyanju, wey be Team Lead for Maternal and Neonatal Mortality Reduction Innovation Initiative (MAMII), drop di gist during di Eko Health Convention 2025 for Lagos. Di info land for statement from Office of di Governor on Wednesday. Dr. Adeyanju hail Lagos State Government for their leadership and say dis new pilot program go help women get better access to emergency care and delivery support.

Governor Babajide Sanwo-Olu still use di convention talk say him government go continue to push for world-class, tech-driven health system. He talk say di ILERA EKO insurance and di July 2024 Executive Order wey make health insurance compulsory for all Lagosians go help protect people from unexpected medical wahala. Di Governor beg residents to register for insurance, live healthy, and support immunization campaign, because government, professionals and communities gatz work together to make health reform work. Dem also show off big achievements like Maternal and Child Centres for Eti-Osa, Badagry and Epe, new hospitals for Ojo and Somolu, Lagos Mental Health Institute for Ketu-Ejirin, plus emergency service boost with over 3,000 new health workers, 28 ambulances and 10 motorbikes. Dem dey also push digital healthcare with SHIP platform, and plans still dey ground to finish big hospital projects like New Massey, Iba-Ojo General, and Lagos Cancer Institute.