NPFL Wahala: Teargas Fly After Pillars, 3SC Draw

Di Nigeria Premier Football League enter spotlight for wrong reason on Sunday as Shooting Stars’ late equaliser cause gbege for Sani Abacha Stadium, Kano. Di high-tension Matchday 8 clash end 1–1, but na afta final whistle wahala start. Some Kano Pillars fans vex enter pitch, attack match officials and Shooting Stars players. Di match bin start well for Pillars as Mustapha Jibrin score early for 9th minute, but Adams Mustapha spoil dia joy with late goal deep into added time. As whistle blow finish, angry fans break barrier, chase referees, throw objects, and punch dem, videos of di chaos don go viral online.

Di violence no end there. Shooting Stars players like Ismail Ayodele and Adams Agba’a chop head injuries for di madness. Police throw teargas scatter crowd and carry referees, away players, and officials comot safely. NPFL condemn di attack sharp-sharp, say dem no go tolerate violence, and promise serious action once dem review full report. Kano Pillars management admit say some bad belle fans cause di wahala but say security control am quick. Dem even arrest some suspects and vow say anybody wey mess up go face law. Pillars talk say all identified troublemakers go chop 10-season ban from Sani Abacha Stadium. As NPFL dey try raise di league standard, dis kain disgrace fit cost more than 2 points, reputations, punishments, and di future of di league dey at stake. All eyes dey watch wetin go happen next.