Ochanya Death: Family Cry Say Dem Still Dey Feel Her Pain Seven Years After

Seven years don waka since 13-year-old Ochanya Elizabeth Ogbanje die that sad death wey shake Nigeria that year, but her family still dey live with pain and tears as justice never still show face. For Benue State, her people still dey remember the bright-eyed pikin wey get big dream to go school but end up for wicked hands. Her brother, John Ameh talk say every year dey remind dem say justice system for Nigeria slow and one-sided. He say the tori wey dem hear say Victor fit dey Lagos don open old wound again, but e also give dem small hope say maybe justice fit still happen one day. Di mata pain reach say court for 2022 free Professor Ogbuja from di case while him wife Felicia get five months for negligence something wey shock plenty Nigerians and make di family vex say justice don truly fail dem.

Now, activists don rise again dey shout for #JusticeForOchanya. Child rights advocate Betty Abah talk say e don reach seven whole years and Victor still dey waka free for Lagos dey chase music career while police dey claim say dem no fit find am. She blast di system say di main culprit slip away under “legal grammar” and di family still dey suffer threats from people wey get power. Even Senator Natasha Akpoti-Uduaghan and activist Aisha Yesufu don join voice, talk say Nigeria don fail Ochanya and must reopen di case. Across social media, #JusticeForOchanya, #EndRapeCulture, and #ProtectTheGirlChild don trend again as Nigerians dey para say if justice no come for Ochanya, e mean say poor people no get hope. Di Ogbanje family talk say dem no go rest until Victor face law because Ochanya life no suppose waste for nothing.