2026 Hajj: NAHCON Don Complete Hotel And Kitchen Check For Madinah

Di National Hajj Commission of Nigeria (NAHCON) don talk say dem don finish strategic inspection of accommodation and catering facilities for Madinah as part of early preparation for di 2026 Hajj operations. NAHCON yaRn dis one for statement wey Ahmad Muazu, Technical Assistant to di NAHCON Chairman on Media, release. Muazu talk say di inspection exercise happen from November 3 to 5 and na Prof. Abubakar Yagawal, Commissioner wey dey in charge of Planning, Research, Statistics, Information and Library Services (PRSILS), lead di team. Di delegation include representatives from di Office of di Vice President, board members, State Pilgrims’ Welfare Boards Forum, and senior management officials of di Commission. Di aim of di inspection na to check di readiness of all service providers, confirm say hotel and kitchen facilities meet NAHCON and Saudi regulations, and ensure compliance with feeding and accommodation guidelines. Over three days, di team check more than 20 hotels inside Markaziyya area and seven catering facilities.

Muazu talk say di inspection show strong compliance with hygiene and safety standards. Meanwhile, di NAHCON Chairman/CEO, Prof. Abdullahi Usman, don charge di committee members to maintain high ethical and professional standard as dem dey carry out dia assignment. According to am, integrity, transparency, and impartiality must guide every inspection, because di welfare, safety and comfort of Nigerian pilgrims na di commission’s top priority. Di NAHCON boss still talk say dem go strengthen dia regulatory framework, improve accountability among service providers, and make sure Nigerian pilgrims get full value for every service wey dem pay for. Di News Agency of Nigeria (NAN) report say di inspection team go submit dia report soon for review and policy action. NAHCON don also announce earlier for July say preparation for 2026 Hajj don start, and Prof. Abdullahi Saleh Usman thank Almighty God for di smooth and successful completion of di 2025 Hajj exercise wey see all Nigerian pilgrims return home safely.