BSMH 6.0: Sanwo-Olu Go Show As Experts Reason Social Media, AI And Ethics Matter

Lagos State Governor, Babajide Sanwo-Olu go show face for di 6th edition of Bodex Social Media Hangout (BSMH 6.0) wey go happen from Friday, November 21 to Sunday, November 23, 2025. Di event wey carry di theme, “Social Media & A.I Influence: Transforming Yourself, Services & the Society,” go touch how innovation, influence and integrity dey shape today’s digital world. Di convener, Bodex Hungbo, yarn say di three-day program go scatter ground for UNILAG, Akoka and Radisson Blu Hotel, Ikeja, as e go bring together policymakers, academics, creatives, and legal experts wey dey shape Africa communication and tech space. Day one go focus on ethics, education and youth empowerment for di A.I era, with speakers like Prof. Oloruntola Sunday, Lady Lola Adey, Bosun Osifowora, and Dr. Akin Olaniyan, while di youth panel go reason “The Future is Now – Youth, Tech & Purpose.”

Di second day wey go hold for Radisson Blu, Ikeja, go center on A.I-powered professional, legal, and creative industries, with speakers like Gbenga Omotoso, Kayode Akintemi, Dr. Kelechi Okoro, Dr. Seye Kehinde, and Bamidele Olamilekan A. Dem go break down topics like data use, journalism, healthcare and A.I creativity. Di grand finale go sweet wella as e go feature Bodex Media Awards, to celebrate people and brands wey dey use social media and innovation do better thing for society. Governor Sanwo-Olu go serve as Keynote Speaker and Honouree, and go collect Most Friendly Digital Media Governor of the Year Award. Other awardees na Dr. Seye Kehinde, Denrele Edun, Kolade Mayowa Bolade, Ademusoro Emmanuel, Erem Emeka Nehemiah, Adeyemo Biliqis Omolade, and Obembe Oluwatosin Femi. Di convener talk say di award no just dey celebrate people, but e dey push di Bodex vision — to promote ethical influence, creativity and leadership across generations.