“We Gats Focus” — Arokodare Ahead Of Wolves vs Villa Derby

Wolverhampton Wanderers striker Tolu Arokodare don talk say di team gats ready to fight for win as dem face Aston Villa for di West Midlands derby. Wolves don collect only two points from 12 Premier League games dis season, and Rob Edwards’ side dey desperate to grab dia first league win against Villa. Arokodare yarn say even though di match get extra weight as local derby, im wan remove pressure and focus on result. “It’s a local derby so it’s exciting for di fans but I go take am like any other game because we never get di right results, so we gats focus on di match,” di Nigeria international tell Express and Star. E add say dis fit be di game wey go change everything for Wolves in a positive way with three points.

Arokodare, wey make im third Premier League start in di 2-0 loss to Crystal Palace last weekend, admit say e don dey patient as e dey wait for more game time. “I never get many chances but I understand why completely,” e talk, adding say im don get good conversation with Vitor Pereira and dem explain am perfectly as e still dey new to di league and need to learn. E say if e gats stay out of di team to learn, e dey okay with am. E also reveal say new coach Rob don tell am wetin e want from am and e just gats continue to do am.