LASTMA Don Carry Drone Enter Road, Dem Dey Use Am Monitor Traffic Live For Lagos

Lagos State Traffic Management Authority (LASTMA) don launch use of drone to monitor traffic and do security watch across Lagos. Dis one mean say dem don dey move from manual wahala to digital smart tools wey go make road matter sharp and clear. As dem launch di new program, LASTMA General Manager, Olalekan Bakare-Oki, talk say dis new system go give dem live view from sky on top major roads, so dem fit respond quick to traffic jam and any emergency wey show face. “No be just to buy equipment we dey do, dis move na big strategy to change how LASTMA take operate, make dem stand front for digital traffic control. These drones go dey give us live eye from sky, help us respond faster, make road safer, join body with emergency people quick, boost security, and help drivers sabi behave for road,” na wetin Bakare-Oki talk. E explain say di drones go dey do sky-level surveillance and high-definition monitoring, so LASTMA officers fit act sharp before wahala go even start, no be only to dey waka up and down for road again.

E talk say dem go use di drone under strict law and correct conduct to make sure say people trust di system and dem no go use am abuse anybody privacy.We wan assure everybody say dis drone matter go follow correct rules, we go respect people privacy, do am clean and straight, so people go trust say we no dey hide anything,” na wetin he still add. Di agency talk say dis drone technology go also help dem respond faster to road accident and emergency matter, and e go work hand-in-hand with dia toll-free hotline wey still dey active. Bakare-Oki yarn say di drone program follow Governor Babajide Sanwo-Olu THEMES+ agenda, wey focus on technology and innovation to take manage Lagos well and make di city safe. LASTMA still talk say di whole program na part of dia plan to reduce travel time, stop accident, and make drivers behave well for road all over di state.