Madagascar Presido Rajoelina Run As Gen Z Protest Scatter Government

Madagascar Presido, Andry Rajoelina, don jackpa comot di country as Gen Z youths lead heavy protest wey topple di government, opposition leader Siteny Randrianasoloniaiko tell Reuters on Monday. E talk say na on Sunday di man waka, after soldiers join di protesters. “We call di presidency people, dem confirm say he don leave,” Siteny yarn, but nobody sabi where di presido dey now. One military source confam say Rajoelina fly comot with French military aircraft wey land for Sainte Marie airport, then helicopter rush carry am enter di plane. RFI talk say him don strike deal with French Presido Emmanuel Macron before e vanish. Protest start since September 25 over light and water wahala, but e later turn to gbege about corruption, bad government and no basic services.

Wetin shock pass be say CAPSAT, elite army unit wey help Rajoelina take power for 2009, now join protesters and even escort dem for Antananarivo main square. Dem refuse to shoot civilians, sack old army chief and appoint new one. Gendarmes sef switch side and take over di gendarmerie formally on Monday. Senate President wey people dey vex for don chop sack too, and dem don put Jean André Ndremanjary to hold ground until election. Crowd full di capital square dey shout, “Di President must quit now!” as tension high. One hotel worker, Adrianarivony Fanomegantsoa, 22, talk say him small salary no fit even buy food, say na sufferness from di government make Gen Z vex. Since protest start, at least 22 people don die for clash with security, and 75% of di 30 million people for Madagascar still dey live inside poverty, according to World Bank.