Premier League Star Don Face Gun Threat From Football Agent

Tottenham don yarn say dem dey give full support to Destiny Udogie and im family after di club confirm say di Italy defender bin face gun threat from one football agent. According to reports  di matter happen for London on 6th September, where one unnamed Premier League player bin target. Another man too don allege say di same person wey hold di gun bin blackmail and threaten am during di same incident, but nobody wound for di wahala. Di Metropolitan Police don carry one 31-year-old man wey dem suspect say e get firearm with intent, blackmail and driving without licence. Dem arrest am on 8th September and later grant am bail while investigation still dey go on.

For di statement wey Tottenham drop on Tuesday, dem talk say, “We don dey give Destiny and im family support since di incident happen and we go continue to do so. As e be legal matter, we no fit talk more on am.” Destiny Udogie, wey be 22 years old, join Spurs from Udinese for £15 million on five-year deal for summer of 2022 before dem send am back to di Serie A club on season-long loan. Di Italian defender don play 76 matches for Tottenham since e return for 2023/24 season and don feature 10 times dis season, including di 4-0 Champions League win over Copenhagen on Tuesday night.