“Uganda Coach No Send Naija Stars Ahead AFCON Clash”

Uganda national team head coach, Paul Put, don yarn say im boys no dey fear Nigeria or any team for di upcoming 2025 AFCON wey go happen for Morocco from December 21, 2025 to January 18, 2026. Di Cranes land inside Group C with Nigeria, Tunisia and Tanzania, and di Belgian coach talk say even though di Super Eagles don win di cup three times, Uganda go still give dem serious wahala. Put, wey don coach different African teams before and even lead Burkina Faso reach 2013 AFCON final where dem lose 1–0 to Nigeria, talk say im team no go allow intimidation enter dia body. “Nigeria get stars everywhere, from Europe to Africa, but we no dey fear dem. We go respect all, but we go still show dem say we sabi play,” e tell CAFOnline.com.

Put talk say im target na to make Uganda advance go knockout stage and also show modern football sense for field, balance and full commitment. Nigeria go face Uganda for dia last group game on December 30 for Fez Sports Complex after dem don play Tunisia and Tanzania. Di Super Eagles dey chase dia fourth AFCON title after dem finish second for last edition for Ivory Coast, while Uganda dey make dia eighth AFCON appearance since dem reach final for 1978 wey Ghana beat dem. Di Cranes go begin closed camping for Morocco next month before dem play warm-up matches ahead of dia first group game against Tunisia on December 23.