“We Wan Carry Am” — Chelle Yarn On Super Eagles Plan Ahead AFCON 2025

Super Eagles head coach, Eric Chelle, don yarn say im and im boys dey ready to conquer di whole Africa for AFCON 2025 wey go happen for Morocco. Di coach talk say di West African giants no just dey go play, dem dey go win di cup. E remind fans say Nigeria reach di final for di last AFCON but lose 2-1 to Cote d’Ivoire, and now di plan na to correct dat mistake. According to am, “We wan win am. My last AFCON na great experience, and dis Morocco own go sweet. Di players don dey play under pressure since March, so e no go new to dem.” Chelle talk say once dem land for Morocco, e go hard any team stop dem because di boys don suffer and bounce back strong.

Di coach still hail some big African teams like Morocco, Tunisia, and Cote d’Ivoire, but e talk say Super Eagles strength na from di wahala dem don face and overcome. Di team land for Group C with Tanzania, Tunisia, and Uganda, and Chelle believe say no team small for AFCON. He yarn say, “Every nation dey come with confidence and plan. But as we be Nigeria, with our history and better players, we must show class.” Di Eagles go kick off dia campaign for Fez, Morocco, on Tuesday, December 23, when dem face Tanzania’s Taifa Stars for dia first group match.