2,000 Residents Don Benefit From Lagos Council Health Outreach

Di Chairman of Agboyi-Ketu local council development area for Lagos state, Adetola Abubakar, don announce say over 2,000 residents go benefit from one three-day health outreach wey di council organise. She talk dis one for di opening ceremony wey happen for di council secretariat, Agboyi Road, on Tuesday. Our correspondent wey monitor di event see say dem check people blood pressure, blood sugar, eye, kidney function and other vital tests. People wey get high BP collect free blood pressure monitor to dey check dia body wella, while some get eyeglass and free drugs. Abubakar talk say di outreach na part of her government plan to make sure residents dey conscious of dia health. She yarn say di programme go run for three days, Tuesday to Thursday for three locations, and dem don already pass dia target because of di massive turnout. She also promise say people wey dem discover serious health wahala go dey get follow-up treatment.

Di Head of Agboyi-Ketu Primary Healthcare Centres, Dr. Mariam Oshodi, talk say di high blood pressure wey dem see among residents fit be because of plenty wahala like economic stress. She beg people make dem dey always check dia BP and visit government hospitals for proper care. Many beneficiaries hail di council for di kind initiative, say e go help reduce di stress of treating health issues. One man, Monday Okadigbo, wey collect free BP monitor, talk say im work dey make im BP rise but di machine go help am control am. Another beneficiary, Olayinka Oni, thank di LCDA, talk say she no dey fit afford regular check-up before but now she go dey take her health serious.