Mbappe Score Two Penalties As 10-Man Real Madrid Win Marseille For Champions League Opener

Los Blancos chop early blow as Trent Alexander-Arnold pull up just three minutes into di game with wetin look like hamstring injury. As if e no do, another wahala land for Los Blancos as Dani Carvajal, wey replace Alexander-Arnold collect red card with just 18 minutes to go, after e face Geronimo Rulli and use head charge the Marseille keeper. But the 15-time European champions still waka commot with victory, thanks to Mbappé wey no dull, e step up twice, blast two penalties past Rulli. That na six goals in five games this season, and 50 goals overall for di club. Mbappé reach that milestone in just 64 matches, na only Cristiano Ronaldo better am, with 50 goals in 54 games after him land from Man United in 2009. Timothy Weah open scoring for Marseille in the 22nd minute, blast one heavy shot wey beat Thibaut Courtois clean, after former Man United man, Mason Greenwood, steal ball from Arda Guler for midfield. But Marseille lead no last pass six minutes as Mbappé, wey nearly score earlier with one mad bicycle kick, calmly slot in him first penalty after Geoffrey Kondogbia bring down Rodrygo inside box. Pierre-Emerick Aubameyang try drag lead back for Marseille two times, first one go wide, second one Courtois slap commot sharp-sharp.

Even after Carvajal collect red, Real no back down, dem still dey press and create chances. Dem finally cash out when Marseille defender Facundo Medina handle ball inside box after strong tackle to stop Vinicius Jr. Once again, Mbappé no shake, e stay cool, blast di penalty with enough fire wey beat Rulli, even though di keeper guess correct. Real dey hustle to carry their crown back after dem lose am last season to Arsenal for quarter-finals. Xabi Alonso, wey just start him first season as coach, dey eye to make sure say Real do better for this season league, last time, dem finish 11th and dem gats enter play-offs before dem fit enter knockout stages. La Liga leaders go japa Kazakhstan to face Kairat on 30 September for their next Champions League clash, while Marseille go host Ajax same night.