2026 WCQ: Nigeria W’Cup Hope Dey On Di Line Today, Kickoff Time Don Set

All eyes don gather for New Peter Mokaba Stadium, South Africa, this Friday as Super Eagles go jam di Crocodiles of Lesotho for wetin many dey call Nigeria last-chance match for 2026 FIFA World Cup qualifiers. After di 1-1 draw with South Africa Bafana Bafana for September, e be like say Nigeria don almost miss another World Cup. But hope shine small as South Africa chop point deduction for using ineligible player, wey reduce gap for top of Group C. Now, Nigeria dey three points behind Benin and South Africa, with just two matches remain. Super Eagles no fit afford to lose any of dia last two games, starting with today’s clash with Lesotho.

Dem go still dey pray make South Africa fumble for dia last games against Zimbabwe and Rwanda. With plenty teams still fit top di group mathematically, na must-win game be this one for Polokwane if Nigeria wan keep dia dream alive. For Group C standings, Benin dey top with 14 points and +4 goal difference, South Africa second with same 14 points but +2, Nigeria third with 11 points and +2, while Rwanda dey fourth with 11 points and neutral goal difference. Lesotho hold Nigeria 1-1 for first leg for Uyo last year November, and dem go wan shock Super Eagles again. So far, Nigeria don win two, draw five and lose one, while Lesotho get two wins, three draws and three losses. Coach Éric Chelle don talk say di team gats start strong and stay focused, as weather, referee wahala and player error fit change game. Kickoff na 6:00pm local time (5:00pm Naija time), and fans fit watch am for DStv SuperSport, SportyBet TV and AfroSport.