Dem Force Me Sign For Napoli – Osimhen

Super Eagles striker, Victor Osimhen, don open up say dem force am sign for Napoli for 2020 when im papa dey sick, as agents and club officials push di deal without im full consent. For testimony wey leak from Italy Guardia di Finanza and published by La Repubblica, Osimhen talk say e no even see draft of di contract and dem no carry am along for di negotiation wey Napoli president Aurelio De Laurentiis and Lille people dey handle. Di €70m transfer wey shock Europe that time now dey under capital gains investigation. Osimhen talk say im former agent, Jean Gerard, just wan push di transfer even though im papa dey fight for life, and dem even tell am to fly go Naples di next day after im papa die, something wey pain am well well.

Osimhen yarn say e meet coach for Napoli wey explain di project, then meet De Laurentiis for Capri, but dem dey speak Italian wey e no understand, and when dem ask am if e don see contract, e say e never even receive anything. When e beg im agent show am di contract, dem give am wetin e call “pseudo-agreement”, just ordinary paper. Di striker say frustration make am wan go back France and rest, before e cut ties with im agent and bring in William D’Avila. Di final signing happen for Lille towards end of July 2020, with Napoli official Maurizio Micheli, Lille bosses, and new rep Roberto Calenda present. Now, prosecutors for Rome dey dig deep into di deal, say Napoli and Lille inflate price of some small players wey dem use balance di books. Players like Karnezis, Liguori, Manzi and Palmieri chop €20m valuation, but none play for Lille, dem just loan dem out and release dem later. Na this one don raise serious eyebrow say something no pure inside di Osimhen deal.