JAMB Clear 85 Underage Candidates For Special Admission

Di Joint Admissions and Matriculation Board (JAMB) don announce say 85 underage candidates don successfully pass dia tough screening process for exceptional admission enter tertiary institutions. According to di statement wey di Head of Media, Dr Fabian Benjamin issue on Monday, all di 85 candidates dey under 16 years as of September 2025 and dem qualify after multi-stage evaluation. JAMB talk say di 85 candidates don notify make dem proceed to dia respective schools to complete admission process and print dia JAMB admission letters. Di Board yan say di policy of exceptional admission dey consistent with global best practice wey treat such cases as rare exception, no be di norm.

JAMB explain say under di special category, 599 candidates score 80% for UTME, wey dem later screen dem again through school certificate and PUTME, wey reduce dem to 182 (178+4). After verification, interviews, and final screening, 85 candidates meet all di criteria and dem don clear for admission. Di Board advise any finalist wey miss di final interview make dem submit request through di JAMB Support Ticketing System under di ‘2025 Underage Complaint’ category. Candidates wey score 320 and above but never upload O-Level result fit still do am within two days, not later than October 29, 2025. JAMB yan say dem go maintain transparency, inclusiveness, and academic integrity for all tertiary education for Nigeria. Dis follow di Ministry of Education policy wey set 18 years as minimum age for tertiary admission, but court case by former NBA chairman John Aikpokpo-Martins stop di policy, wey allow JAMB to create screening for underage students under exceptional admission.