Police Don Catch E-Hailing Driver For Lagos Over Sɛxual Misconduct

Police for Lagos don arrest one e-hailing driver, Adedayo Adegbola, wey dem accuse say e dey rob, beat and forcefully sleep with women passengers. Di suspect fall yakata after detectives from State Criminal Investigation Department (SCID), Panti, Lagos Police Command, track am down over plenty cases of r@pe, defilement, assault, and armed robbery against female passengers for different parts of di state. Lagos State Commissioner of Police, Olohundare Jimoh, order sharp investigation after plenty women report di matter. Na di Police Joint Investigation team work wey lead to Adegbola arrest on October 31, 2025, and dem recover di red Toyota Corolla wey e dey use registration number JJJ 226 HT as exhibit.

Police spokesperson, Abimbola Adebisi, talk say investigation still dey hot to catch other people wey join hand for di crime. She beg other victims make dem come SCID Panti to drop information wey go help, promising say police go protect dia identity. Di Commissioner of Police assure Lagos people say di command no go rest until justice show face for all survivors and di safety of residents dey guaranteed. He talk say more updates go come as di case dey go on.