Lagos Go Launch Digital Platform To Approve Telecom Infrastructure By 2026

Lagos State Government don yan say dem go digitalize and automate di way dem dey give approval for telecommunication infrastructure project through one new platform wey dem call Telecommunication Infrastructure Regulatory System (TIRS) wey go launch by February 2026. Di General Manager of Lagos State Infrastructure Maintenance Regulatory Agency (LASIMRA), Prince Oyekanmi Elegushi, talk dis one for statement wey him sign. According to am, di new system go make sure say all telecom project for Lagos follow regulation well, and e go make di whole process transparent, sharp, and accountable. Di TIRS platform go help fast-track how companies take get permit to install mast, tower, and right-of-way for fiber optic cable, without all di long waka and unnecessary physical wahala.

Elegushi talk say di new TIRS go cut human interaction by almost 99%, as companies go fit now apply for mast, tower, and fiber permit online without waka go any office. E still reveal say LASIMRA don already train all dia staff  both theory and practical  to sabi how di system go take work well once e start to operate. E add say dis move show di Lagos State Government commitment to build better, open and investor-friendly environment for telecom operators. Di GM also yan say di TIRS dey in line with Governor Babajide Sanwo-Olu vision to push digital governance and use technology take improve service delivery for di state.