Nigeria Still Beta Place For Investment — Lekki Free Zone Oga Talk

Despite di wahala wey dey and how people dey see Nigeria for bad light, di Managing Director of Lekki Free Zone Development Company, Mr. Dai Shunfa, don yarn say Nigeria still be correct and promising place wey business fit grow well-well. He talk this one for Lagos on Tuesday when journalists visit di zone. According to am, di biggest problem wey dey stop investors from coming na di plenty rumour wey dey fly say Nigeria no safe, say na kidnap and killing full everywhere. He talk say dis kind gist don make plenty foreign investors dey fear to bring dia money come. Shunfa come talk say he don dey Nigeria for almost 20 years and e no see any country wey no get im own wahala. He beg investors make dem change how dem dey see Nigeria because wahala dey everywhere, no be only here.

Shunfa still talk say di Lekki Free Zone get about 3,000 hectares of land but dem don develop only 500 so far, and dem still dey work hard to attract new investors from China, Nigeria, Africa and Europe. He talk say with di new Lekki Deep Seaport, Coastal Highway and better infrastructure, di place dey grow fast. From January till now, dem don sell over 110 hectares to 16 big customers something wey pass wetin dem do in seven years before. He still yarn about di new tax reform, say even though some free zone companies don lose small privilege, businesses still dey do well and dey help Nigeria economy. Di Legal and Compliance Manager, Mr. Toluwaleke Adeyele, add say di zone get world-class infrastructure and even gas pipeline from Dangote project, wey dey make heavy industries like tyre assembly and manufacturing grow inside di zone. As e be now, 134 companies don sign agreement, 65 dey operate, and 10 dey under construction. Di zone wey dem start for 2006 still dey open for more investors to come put dia money where e go yield.