TP Mazembe Fan Kpai For Machete Fight With Lupopo Fans

Big wahala don shelle for Congo as TP Mazembe confirm say one of dia fans don die after machete knack am during Sunday Linafoot derby against FC Saint-Eloi Lupopo. Di five-time African champions talk for statement wey dem drop on Monday say di fan die for Lubumbashi Kenya area after di violent clash. “TP Mazembe dey mourn di death of one of dia supporters wey die on Sunday, November 2nd, for Frederic Kibassa-Maliba Stadium,” di club yarn. “Dem hit am for head with machete, rush am go stadium medical centre but e no make am before dem carry body go Kenya Hospital morgue.” Di club president, Moise Katumbi, also send im deepest condolences give di family and di whole Mazembe community.

Di derby match sef end for blood and chaos as Lupopo come from one goal down take win 2-1 with Ravel Djoumekou late goal for 87th minute. Di goal burst jubilation among home fans but Mazembe supporters vex, begin fight demsef and tear stadium seats throw enter pitch. E never clear if na di machete person take target di victim or na stray attack. Reports still dey say many fans from both sides chop injury. Dis sad incident don join di long list of deadly football wahala wey don happen for Africa because of poor security, bad crowd control, and fan misbehaviour, from South Africa to Ghana wey 127 fans die for di 2001 Accra Stadium tragedy.