UK Don Order Poultry Restriction As Bird Flu Dey Spread

Di UK goment don order make all poultry and captive birds for England remain indoors from Thursday, November 6, as bird flu don begin waka up and down for di country. For di statement wey dem drop on Tuesday, November 4, di Department for Environment, Food and Rural Affairs (DEFRA) talk say di new rule go affect anybody wey get more than 50 birds or dey sell or give egg to people. Dis one na to help control di avian influenza wey don spread wella. Before now, na only some parts of northern, central, and eastern England di rule dey, but now, e don cover di whole country.

UK Chief Veterinary Officer, Christine Middlemiss, talk say di step dey necessary because di virus dey spread among wild and farm birds anyhow. She talk say dem no get choice but to extend di housing order to protect poultry farmers. Even though di bird flu fit affect poultry business seriously, authorities don assure say di risk to human health still low and cooked chicken and egg still safe to chop. Reports from European Surveillance for Animal Health (ESA) show say from August reach late October, dem record 85 bird flu cases across Europe, with six inside Britain. As part of dia response earlier this year, UK goment don already dey do bird culling for affected zones and tighten hygiene and movement control. Di virus dey spread through bird droppings, saliva, and dirty water, and vaccination still dey banned except for zoo birds under vet watch.