D’Tigers Don Sharply Drop 11 Places, Land For 53rd Spot For FIBA Rankings

Nigeria men basketball team, D’Tigers, don drop 11 places for di latest FIBA world rankings, dem dey now for 53rd position, afta dem commot for AfroBasket 2025 tournament wey happen for Angola. Di team still fall from number six go number eight for Africa, as dem get 248.7 points now, compared to di 297.8 wey dem get for March 2025 rankings. Di drop put Nigeria among di teams wey fall pass for di whole world, join body with Morocco, Tunisia, Virgin Islands, and Kosovo. Meanwhile, Mali, South Africa, Turkey, Cyprus, and Jamaica na dem gain pass for di latest rankings.

 Under di control of coach Mohammed Abdulrahman, D’Tigers reach di quarter-finals for AfroBasket 2025 but Senegal knack dem comot, 91-75. Even though dem lose, players like Caleb Agada, Josh Okogie, Stan Okoye, and Ike Nwamu still show better performance, especially for di group stage where Nigeria top Group B with wins over Madagascar, Tunisia, and Cameroon. Di quarter-final waka-out pain us, but di team show small small signs of strong play for di group matches,” na wetin Abdulrahman yarn. “We don see wetin we gatz work on, especially for preparation and make we dey consistent, as we dey prepare for di next qualifiers. Di team don now focus on di FIBA Men’s World Cup Qualifiers wey go start for November, as dem dey target to secure one spot for di 2027 edition wey go happen for Qatar. Di last time wey Nigeria show face for FIBA World Cup na for 2019 for China under former coach Alex Nwora. For di African continent, South Sudan still be number one team, followed by Angola, Ivory Coast, Egypt, and Senegal. For global level, United States still dey lead for FIBA rankings, with Germany, Serbia, France, and Canada complete di top five.