EU Go Support Ukraine ‘Every Step Of Di Way’ Until Peace Show

Di President of di European Commission, Ursula von der Leyen, don vow say Europe go stand gidigba with Ukraine and support dem every step of di way until dem achieve “just and lasting peace”. She tell EU lawmakers on Wednesday say di revised US plan to end di war fit be “starting point”, even as Europe dey scramble to boost Ukraine and counter US proposal wey many see as tilted toward Russia demands. Von der Leyen talk say days of negotiation don begin to shape ground for possible settlement, but Russia still never show any sign say dem wan truly stop di fight. She add say even though di situation dey volatile and dangerous, opportunity dey to make real progress.

As di US dey push harder to end di war, di EU still dey drag over proposal to use frozen Russian assets fund one heavy 140-billion-euro loan for Kyiv, with Belgium — wey hold most of di assets — delaying di move. Von der Leyen say her team dey prepare legal document for di loan and insist say European taxpayers no go carry di bill alone. Officials dey hope say EU leaders go approve di loan plan for December summit. Meanwhile, EU foreign ministers hold videoconference to discuss US push and Europe own strategy. Von der Leyen stress say whatever peace treaty dem agree, na di EU and NATO partners go handle most of di implementation. She end am with one strong line: “Nothing about Ukraine without Ukraine. Nothing about Europe without Europe.”