Floods For Thailand, Malaysia Kill Over 30, Scatter Thousands

Di death toll for days of heavy flooding wey don scatter southern Thailand don rise to 33, as tens of thousands for Thailand and Malaysia dey displaced, according to officials. Di Thai government don declare state of emergency for Songkhla after torrential rains since last week flood Hat Yai and di entire southern region. AFP photos show how murky brown water don swallow streets and ground floors for residential buildings. Government spokesman Siripong Angkasakulkiat yarn say people die across seven provinces from flash floods, electrocution and drowning, even as e assure say water go soon recede. Di flooding wey don spread across seven provinces don trap residents and travellers for dia homes and hotels, forcing rescuers to use boats, jet skis and military trucks. Di military don deploy aircraft carrier and helicopters to move patients, while over 10,000 people don already evacuate from Songkhla. University campuses don turn to shelters, and di provincial administration say dem fit distribute up to 20,000 food boxes daily to flood victims.

For neighbouring Malaysia, heavy rain don cause massive flooding across eight states with forecasters warning of more rainfall. Over 27,000 people don evacuate to temporary shelters and one person don die for Kelantan, one of di worst-hit areas. Malaysia’s Meteorological Department say thunderstorms go continue until Wednesday for northern states like Perlis, Kedah, Penang and Perak. Floods dey normal for di country because of di northeast monsoon from November to March, but climate change don make di situation worse. Malaysia’s foreign ministry say dem dey monitor di disaster, especially as thousands of Malaysian holidaymakers wey stranded for southern Thailand last week don finally return. As of Monday, over 6,300 Malaysians don cross border back home safely.