NASA Drag Kim Kardashian After She Talk Say Americans Never Land For Moon In 1969

NASA don school reality TV star Kim Kardashian after she bring back di old gist wey talk say Americans no land for Moon in 1969. For di new episode of her show The Kardashians, Kim yarn with her co-star Sarah Paulson say she get articles and videos wey show say astronauts Neil Armstrong and Buzz Aldrin no waka reach di Moon. She even read one quote wey she claim say na from Aldrin mouth, “There was no scary moment because it didn’t happen.” She come add, “Go TikTok go see for yourself, why di flag dey blow? Why no stars?” But plenty fact-checkers don show say di clips wey people dey use push dat gist na edited and out of context. Aldrin himself don always stand gidigba say di Moon landing na real, and e even punch one man for 2022 wey disturb am say di thing na lie.

After di show air, NASA Acting Administrator, Sean Duffy, rush go social media platform X to clear di air. He tag Kim Kardashian and write, “Yes, we don go Moon before… 6 times!” E come use di opportunity take talk about di Artemis mission wey go carry humans go Moon again soon. Duffy end im reply with confidence say, “We win di last space race, and we go win dis one too,” before he invite Kim come watch di Artemis launch for Kennedy Space Center. Kim talk don ginger conspiracy believers online again, as dem dey tell people make dem “go TikTok see proof.” But scientists still dey stand on dia word say di Moon landing real, show evidence of 382 kilograms of rock wey Apollo astronauts bring back and laboratories for different countries don verify am as true.