One kpai, Plenty Wound For Peru Anti-Crime Protest

At least one man don die and over 100 people wound as serious katakata bust during anti-crime protest for Peru capital on Wednesday. President Jose Jeri, wey just enter office some days ago, no fit stop di anger wey full street against di political class. Di Ombudsman Office yarn say 102 people injure, 24 civilians and 78 police. Di protest wey youths lead, carry thousands of angry Peruvians wey vex say govment no dey do anything about rising crime, enter street for Lima and other cities. Some protesters try break security barrier for Congress as night enter, others dey throw stone and fire fireworks. Police wey wear riot gear respond with tear gas. President Jeri talk say 32-year-old Eduardo Ruiz Sanz don die, but no give full gist. One human rights group talk say na possible plainclothes police shoot am.

Jeri still claim say di “peaceful demonstration” don turn another thing as criminals enter to scatter everywhere. Di protest na di latest one wey don shake Peru for weeks now. Lawmakers even impeach former president Dina Boluarte on Friday, as people accuse am say crime don increase under her watch and corruption still full ground. 49-year-old Amanda Meza talk say people vex because govment no dey protect dem, say extortion and contract killing don full ground. Jeri, wey be right-wing politician and former Congress leader, don become interim president till April elections. Di protest on Wednesday na youths, artists, labour unions and even feminist groups organize, with some women para say Jeri dey face old sexual assault allegation (wey dem later close for August). Before Boluarte comot, bus drivers, traders and students don dey protest against gang wahala wey dey collect protection money and attack anybody wey no gree pay. Now, gangs like Los Pulpos and Tren de Aragua dey kidnap and torment people anyhow. Jeri don promise say him go “declare war” on organized crime to try cool di fire wey dey burn di country.