South Korea Don Pass Law To Ban Phone For Classroom From 2026

South Korea don pass one important law wey go stop students from using mobile phone and smart devices during class time, starting from March 2026. Di bill pass with 115 lawmakers voting yes out of 163 wey show. Dem say di law na response to how students don dey too addicted to phone  wey dey affect their school work, social life, and even their mental health. One mama for Seoul, Choi Eun-young, talk say her 14-year-old pikin no dey ever drop phone even when dem dey gist with friends, na back to phone dem go still go, and e don dey disturb their learning. Government survey wey come out for 2024 show say about quarter of South Korea population dey too depend on phone, and for teenagers between age 10 to 19, di number don reach 43%. Many schools already dey control phone use before, but now na real government law don back am.

Di law talk say students no go fit use phone during lesson time, but teachers fit still extend di ban to anywhere for school if dem want. Schools go also begin teach students how to use technology in better way. Pikin wey get disability, or wey need phone for learning or emergency, go still get chance to use am. Di person wey push di law, MP Cho Jung-hun, say him follow example from other countries and research wey show say phone addiction dey damage students brain and growth. Countries like France, Finland, China and Italy don already do similar thing. Some teachers support di law, say phones dey cause plenty trouble for class even to the point wey students dey fight teachers when dem seize phone. But other teachers and students say na surface solution say di main problem na di wahala of South Korea’s tough education system. One student talk say instead of just collecting phone, make dem teach students wetin life fit be without am.