Two Nigerians Don Go Jail For Using Forged Documents Take Get Ghana Card

Two Nigerians, Ike Isaac (wey also bear Alex Kwesi Brown Appiah) and Emmanuel Innocent Egbe (wey also bear Innocent Emmanuel Kodom), don bag 12 months imprisonment each after dem try use forged documents take collect Ghana National Identity Card. Madina District Court II, presided by Her Worship Susana Nyakotey, find di two men guilty of presenting false information and holding forged documents during di Ghana Card registration exercise. Ghana’s National Identification Authority, NIA, reveal dis for statement signed by Williams Ampomah E. Darlas, Head of Corporate Affairs, as dem explain say di men face charges under Section 40(1)(a) of di National Identity Register Act 2008 and Section 166 of di Criminal Offences Act 1960. For judgment on Friday, November 7, 2025, di court sentence dem to 12 months for false information and 13 months for forged documents, but di sentences go run concurrently. Di court also order say after dem finish jail time for Nsawam Prisons, dem go deport dem return to Nigeria.

NIA talk say di conviction show dia strong commitment to protect di integrity of di Ghana Card system as di single credible identity source for lawful residents. Di Authority hail Ghana Police Service, di CID Unit attached to NIA, di Office of di Attorney-General and other partners wey help make di prosecution successful. NIA warn say offences like false information, impersonation and forged documents dey carry serious legal consequences and dem go continue to enforce di law strictly. “Di NIA remain determined to work with security and judicial bodies to detect, investigate and prosecute offenders,” di statement add.