Islamic Council Condemn Talk Say Christians Dey Face Genocide For Nigeria

Di Nigerian Supreme Council for Islamic Affairs don condemn di recent talk say genocide dey happen against Christians for Nigeria. For press conference wey happen for National Mosque, Abuja, di Council Secretary General, Professor Ishaq Oloyede, talk say even though killings don happen for some parts of di country, dem no target Christians alone. Oloyede reveal say investigation and information wey dem get show say some unpatriotic people don carry di genocide story go sell am give America just to cause wahala and disunity among Nigerians. E still urge Federal Government make dem put more effort to secure lives and properties of citizens.

Di Council reaction come few weeks after one U.S. senator, Ted Cruz, accuse Nigerian government of planning genocide against Christians and turning blind eye to di destruction of thousands of churches. Cruz claim say over 52,000 Christians don die since 2009 and more than 20,000 churches and Christian schools don burn. E even introduce Nigeria Religious Freedom Accountability Act for U.S. Senate to sanction Nigerian officials wey e say dey support religious persecution. Same time, former U.S. President Donald Trump order Pentagon make dem plan possible attack for Nigeria after e claim say Christianity dey face serious threat for Africa. Trump still repeat di threat last Sunday, warn say if Nigeria no stop di killings, America go strike,“fast, vicious and sweet,” as e talk for im Truth Social post.