Lagos House of Assembly Standa Gidigba Support State Police

Lagos State House of Assembly don standa gidigba support plan to establish State Police after dem consider constitutional amendment bill wey National Assembly send give dem.

Na di Speaker of di Lagos State House of Assembly, Right Honourable, Mudashiru Ajayi Obasa, tok dis one on Tuesday for inside plenary, after lawmakers cut dia break short to discuss di bill.

Di Speaker tok say State Police don dey among di issues wey di fifth to di 10th Assembly don discuss, as dem dey look for ways to improve security and protect lives and property.

But e complain say some concerns wey State Assemblies raise, especially about who go control State Police and how dem go work with federal police, never get proper attention, and that e believe say dem go address di remaining issues as di process dey go on.

Obasa kon thank lawmakers as dem support di amendment and tell dem to continue dia fine work.