Army Burst Gun Runners, Seize Seven Guns for Kaduna

Edited by: Esther

Troops of Sector 7, Operation ENDURING PEACE, don intercept one suspected arms trafficking gang for Kaduna State and recover three locally made AK-47 rifles plus four submachine guns wey dem hide inside one vehicle, according to Nigerian Army.

Army make dis known for statement wey dem post for dia official social media pages on Tuesday.

Dem say di intelligence-led operation happen early Monday morning for Samaru Checkpoint, Zangon Kataf Local Government Area.

According to di statement, di operation start after security operatives receive correct intelligence say illegal weapons dey move from Jos, Plateau State, go Niger State.

During targeted stop-and-search operation, troops stop one ash-colour Mercedes-Benz and discover di guns wey dem hide inside di vehicle.