Coup Wahala: Military Track ₦45bn For Inside NDDC

Military investigation wey dey probe di alleged coup plot against President Bola Tinubu don burst out new tori say about ₦45 billion waka from di Niger Delta Development Commission (NDDC) accounts go some politicians and detained soldiers wey dem link to di coup gist. Reports talk say di Defence Intelligence Agency (DIA) don grill top NDDC officials to explain how di money take move and who chop wetin. Matter come hot pass when soldiers raid di Abuja house of former Bayelsa governor, Timipre Sylva, wey dem suspect join for di whole matter. But Sylva don deny any hand for coup talk, as him media aide Julius Bokoru yarn say na “wicked politicians” wey dey eye 2027 governorship dey use him name chase clout.

Meanwhile, security sources don confirm say di ₦45bn transaction come from one shoreline project wey NDDC award give one former South-South governor, and small of di money allegedly land for di detained officers’ account. Inside di NDDC office, serious panic don enter as plenty top officials dey fear say di wahala fit turn to massive corruption probe. Di NDDC boss, Samuel Ogbuku, wey once work under Sylva, don deny arrest gist, say him just dey see everything for social media. Di Defence Headquarters still dey maintain say no coup dey happen, say di detained officers na for professional misconduct, not coup plotting. But as di ₦45bn trace continue, Nigerians dey watch how di investigation go unfold — e fit shake plenty big tables for Abuja.