LASG Dey Champion Youth-Led Innovation For Agric

Di Lagos State Government don reaffirm say dem remain committed to empower young innovators wey dey drive change for agriculture sector, as dem declare say di future of food security and agribusiness for Lagos dey inside youth-led creativity, technology and enterprise. For di Lagos Agrinnovation Summit 2.0 wey happen for Harbour Point, Victoria Island, di Deputy Chief of Staff, Sam Egube, wey represent Governor Babajide Sanwo-Olu, talk say di state dey deliberately nurture new generation of agri-entrepreneurs wey fit transform di food system. Egube yarn say di initiative align with di state T.H.E.M.E.S Plus Agenda wey dey push Lagos as 21st-century economy powered by knowledge, digital innovation, inclusivity and sustainable development. He add say di Agri-Innovation Club don turn one of di proudest achievements under dia Agricultural and Food Systems Roadmap, no be just group of young agripreneurs, but movement of innovators wey dey reimagine agriculture with technology, creativity and enterprise. He come hail di Commissioner for Agriculture and Food Systems, Abisola Olusanya, for her efforts wey don attract plenty young people into agric, as he talk say when dem join cabinet seven years ago, one big challenge na how to pull young people enter agric, but today she don succeed.

For her own side, Olusanya talk say di summit show Lagos commitment to build youth-driven, technology-enabled agric ecosystem wey go transform food production and distribution across Lagos. She talk say di goal na to build resilient machinery wey young agri-business owners, creators and thinkers go take form one strong ecosystem of innovation wey go redefine how Lagos dey grow, process, distribute and consume food. She add say di summit represent “di nurturing of beginnings,” where partnership, mentorship, access to resources and supportive policies go turn youth ideas into scalable agribusiness ventures. According to her, through collaboration and belief in young innovators, dem dey build foundation for something extraordinary.