Tinubu Set To Open Ojota-Opebi Bridge, Other Big Projects For Lagos

By: Esther Ayoola

Wi oga Presido Bola Ahmed Tinubu, wan visit Lagos dis week to commission some big projects, including di Ojota-Opebi link bridge.

Governor Babajide Sanwo-Olu through im media aide naim dey announce dis update, say baba Seyi go commission Ojota-Opebi link bridge and other projects.

Di Govo aide sti say, oga presido go visit different projects for Ojota, Opebi, Alausa, Ajegunle and Abijo, as part of di working visit.

Say di two-day visit go start Wednesday, April 8, and end Thursday, April 9, as dem plan to open other places like LASG GIS office and multi-agency building for Alausa.

According to reports, Tinubu go sti launch Tolu Schools Complex for Ajegunle, Maracana stadium with mini pitches, and food logistics hub for Abijo.