LASG Seal 11 Facilities For Environmental Wahala

Di Lagos State Environmental Protection Agency (LASEPA) don seal 11 different establishments for Ikorodu say dem no follow environmental rules, especially noise wahala and other dirty behaviours. For statement wey dem post on X on Thursday, LASEPA talk say di enforcement happen for key areas like Agodo Gas Line, Odogunyan Industrial Layout, Ita Oluwo Junction, Haruna, Ipakodo Road, and Ebute. Di places wey chop seal include bars, lounges, hotels, and companies like Zero Square Bar & Lounge, Starex Poly, Oloruntele Poly, Limpex Resources, Skipper Nigeria Ltd, Star Rain Nigeria Limited, NDO Hotel & Suites, Embassy Lounge, Beechwood Guest House, Obas Hotel & Suites, and A-Star Pencil.

Di GM of LASEPA, Dr. Babatunde Ajayi, wey lead di operation, yarn say dem no go gree make anybody spoil Lagos environment. He talk say di sealing na to protect people health and make di area better to live inside. “Noise pollution and other environmental abuses dey disturb people life and peace,” he talk. “Dis kain operation show say we serious to maintain better Lagos wey clean and safe.” Ajayi beg residents and business owners make dem follow environmental rules, as LASEPA no go ever allow any form of environmental mess for di state.