Smoking, Drinking No Dey Boost Creativity – Veteran Musician Bright Chimezie

Veteran musician Bright Chimezie don comot talk against wetin some artistes dey claim say smoking and drinking alcohol dey help boost creativity. The legendary highlife singer wey popular for him hit song ‘Because English’ say all those kind talk no true at all. As he dey speak recently for one episode of CreativTea Podcast, Chimezie clear the air say people wey dey smoke or drink no dey do am to find inspiration for music, say na just cruise dem dey catch.

“The talk say you need to drink or smoke before you fit get music inspiration no true. If you dey drink or smoke, na just to just enjoy yourself. E no mean say e go make your creativity grow.” na wetin Chimezie talk. The veteran still add say real music inspiration na something wey dey come naturally, no be something wey alcohol or igbo go help you find. According to am, talent and spiritual connection to music na wetin truly matter, not chemical influence. Chimezie use the moment take advise young artistes say make dem no fall for peer pressure or wrong belief say creativity dey inside bottle or smoke. Instead, make dem focus on their natural gifts and develop am with discipline and hard work.