NLC Tell Gornment Say Make Dem Bring Fuel Price Down

Nigeria Labour Congress, NLC, don call on gornment to reduce petrol price, pay workers nationwide wage award and start fresh toks on new minimum wage, as Nigerians dey struggle to survive under high cost of living.

For Independence Day statement wey dia Presido, Joe Ajaero, sign on Wednesday, di union tok say workers and ordinary Nigerians don dey suffer under high transport fare, food price, house rent and school fees.

NLC blame part of di suffering on fuel subsidy removal for 2023, as petrol price don climb reach ₦1,430 per litre or even pass dat amount for some major cities, while pipu for remote areas dey pay more.

Di union say as petrol price dey go up, transport fare, food, rent and school fees dey follow am climb, but workers salary no dey increase to match di suffering, wey dey make life harder for ordinary Nigerians.